Waiting List 2 und 3

Jasmin: Und dänn hämmer ja welle mit em Zug uf Goa!
Philipp: Ou ja, genau. Bis mir im Fall nur scho die Tickets ghaa händ! Das isch doch in Madurai gsii.
Jasmin: Jetzt muesch der vorstelle: e rächt grossi Stadt, grosse Tämpel, heiss, stickig und mega vill Lüüt. Eigentlich möchtsch am liebschte de ganz Tag im klimatisierte Hotelzimmer bliibe und erscht mit em Sunneundergang use. Und zerscht muesch sowieso usefinde, wo de Bahnhof isch.
Philipp: Also nei, zerscht muesch emal wüsse, was d’überhaupt wetsch: Zugsnümmerli, Datum, Ziit und alles. Aber du kännsch eus ja: Reisebüro chunnt nöd in Frag. Das mues jetzt eifach ohni gah. Genau das machts ja uus.
Jasmin: Also simmer is Internet und händ nach emene Ziitli au die richtig Iisebahnsiite gfunde.
Philipp: Die Siite isch gar nöd schlächt gmacht gsii. Hettsch sogar chöne s’Billett online bstelle.
Jasmin: Hettsch. Nach öppe sächs Mal probiere hämmers ufgäh und müese iigseh: Ohni indischi Kreditcharte gaht gar nüt.
Philipp: Also hämmer eus en Zättel usegschribe mit em Zugsname, sinere Nummere, em Datum und de Fahrziit. Bis mir nur scho tscheckt händ, was es alles für Klasse git!
Jasmin: Und wo mir das alles ändlich ghaa händ, hämmer chöne luege, wie tüür das öppe chunnt.
Philipp: Also am gliiche Tag hämmer das grad chöne vergässe …
Jasmin: … und am Morge isch es sowieso agnähmer gsii vo de Temperatur här. Aber vor de zähne muesch au nöd det sii. Da schaffed die i de Regel no nöd vill.
Philipp: De vom Hotel isch echt nett gsii. Mir händ em gseit, er söll es Taxi cho la für an Bahnhof.
Jasmin: Er hätt grad gseit, das chämi vill z’tüür, isch mit use cho und hätt eus en Tuktuk-Fahrer grüeft. Er hätt sogar für eus de Fahrpriis verhandlet.
Philipp: So billig simmer nachher nie meh gfahre.
Jasmin: Ich säg dir, Tuktuk fahre: iistiige, fescht hebe, d’Auge zue und erscht wieder uftue, wänn er de Motor abstellt. Susch überläbsch das nervlich nöd.
Philipp: Ou ja, und öppis isch au cool: Bi de Schlaglöcher manövrieredsi mit ihrne drüü Rädli immer so, dass sie vorne möglichscht sanft dervo chömed. Und du hine uf de Hinderachs holsch der derwiil en Bandschiibevorfall.
Jasmin: Dänn staasch am Bahnhof und muesch zerscht emal luege, a welle Schalter. Zum Glück isch e chli öppis uf Änglisch agschribe gsii. Zerscht simmer i so es zweistöckigs Gebäude, unne ine, will det öppis vo wäge Ticket gstande isch. Nume: Das Gebäude isch absiits vom Hauptgebäude gstande.
Philipp: Mir isch das e chli komisch vorcho. Während d’Jasmin agstande isch, bin ich is Hauptgebäude übere go luege. Det hätts im Näbetrakt vill Schalter ghaa, elektronischi Aazeige und alles, fascht wie bi eus. Ok, mir sind falsch, han i dänkt, und bin d’Jasmin sofort go hole.
Jasmin: Dänn simmer det agstande – und händ erfahre, dass mir doch wieder i das zweistöckige Gebäude müend. Aber obe ine. Bi ihne chömed mer nur Lokalbillett über.
Philipp: Also mir wieder zrugg.
Jasmin: Obe simmer dänn eifach emal agstande. Öppe vier Schalter sind offe gsii, eine für Gruppereise, die andere eifach so.
Philipp: Und während em Astah hätt d’Jasmin gmerkt, dass all andere es Formular i de Hand händ.
Jasmin: Die sind hine a de Wand gläge. Eis hämmer gholt und agfange usfülle. Zum Glück hämmer eus so guet vorbereitet ghaa, das Formular isch nämlich gsii wie es Gsuech: Nümmerli, Zugsname, Datum, Reiseziit, vo wo nach wo de Zug fahrt, wo du zuestiigsch und so. Wer da nöd sin Zättel debii hätt, cha grad wieder hei.
Philipp: Es hätt scho Tafle a de Wand ghaa, aber alles uf Kannada, ihrer Sprach. Mir hettid kei Chance ghaa, überhaupt usezfinde, öb das Züüg sind oder so. Ich weiss es eigentlich hüt no nöd.
Jasmin: Mit dem Gsuech simmer wieder agstande. Irgendwänn simmer dra cho, händ em eusen Zättel unedure gschobe, und er hätt meh oder weniger die Infos i sin Kompi ghackt. Nach es paar Minute luegt er eus a und seit: De Zug seg voll.
Philipp: Dänn isch so en komische Moment entstande, wo niemert öppis gseit oder gmacht hätt. Er hätt in Kompi gluegt, als wüsst er i somene Fall au nöd, was mache. Ich han mir eifach gseit: Da gahsch nöd weg, bevor du die Tickets häsch. Und genau i dem Moment seit d’Jasmin: „Can you help us, please?“
Jasmin: Und dänn hätt er agfange umetöggele wie wild. Bis er en mögliche Zug gfunde hätt. Bitte fröge wirkt halt au in Indie.
Philipp: Irgendöppis vo wäge Waiting List zwei hätt er no gseit. Ich han es paar Mal probiert nachezfröge, was das für eus bedüütet. Sini Antwort isch immer di gliich gsii: „No problem“, es gieng ja no lang, bis mer gönd, drum seg das kei Problem.
Jasmin: Er hätt die neue Date uf eus Gsuech kritzlet: Mir söled das jetzt nomal frisch usfülle.
Philipp: Zahle mit Charte isch au nöd gange, also hämmer eus ufteilt: D’Jasmin macht s’Formular, ich gang go Gäld uftriibe.
Jasmin: Ich hans übrigens no zweimal usgfüllt, will ich us sim Gekritzel nöd schlau worde bin und voll d’Abfahrtsziit und d’Zugsnummere verwächslet han. Underdesse hätt de Typ de Schalter dicht gmacht und isch gange. Ich bin trotzdem agstande und han eifach gwartet. Uf de Philipp und uf de Typ. Wer zerscht chunnt, gwünnt.
Philipp: I dere Ziit bin ich wieder zrugg is Hauptgebäude, i d’Haupthalle. Bankomate hätts ja i jedem Kaff in Indie, also wirds am Bahnhof au eine ha. Und voll: Chuum chum i ine, staht eine am Egge. Ich ine – Chälteschock! Die ATM-Kabine sind immer uf 16 Grad abegchüelt. Und es isch de erscht Chaschte gsii in Indie, wo d’Charte würklich iizoge hätt.
Jasmin: Normalerwiis muesch si ämmel nur churz inestecke und grad wieder usenäh.
Philipp: Und de Chaschte lauft voll nöd. Ich han öppe drüü Minute müese warte, bis d’Charte wieder usecho isch. Drüü Minute chönd lang sii. Okay, ich also wieder use. Und dänn isch das scho eifach wieder Indie: Zmitzt i de Haupthalle sitzed es paar Fraue am Bode. Nöd öppe jungi, sondern normali Erwachseni. Sitzed da, ässed e chli öppis und schwätzed. Und dänn gsehn i erscht de ander Typ: Liit am Bode, d’Reisetäsche näbed sich, streckt d’Ärm und d’Füess wiit vo sich. Zmitzt drin. De isch nöd öppe druf, ihm isch wahrschiinlich eifach wöhler so. Und all andere laufed um ihn ume und beachted en gar nöd. Ich stell mir immer vor, was passiere würd, wänn ich das z’Züri am HB mache würd. Uf jede Fall hätts wiiter hine nomal en ATM ghaa. Und de isch gloffe.
Jasmin: No bevor de Typ wieder cho isch, sind hinder mir au wieder anderi Lüüt agstande. Und mini Hoffnig hätt sich nach es paar Minute bestätigt: Mini neue Date sind in Kompi ghackt worde, und de Drucker hätt scho grattered, wo de Philipp mit em Gäld näbed mir gstande isch. Timing isch alles.
Philipp: Mir sind jetzt stolzi Bsitzer vo Tickets, Waiting List ‚no problem‘-zwei und ‚no problem‘-drüü. Mal luege, wo ane die eus bringed.
Jasmin und Philipp: ab